మహాలక్ష్మి పేరుతో మహిళలను మోసం చేసిన దుద్దిళ్ల: పుట్ట మధూకర్
బస్సులు తగ్గించి చార్జీలు పెంచుతున్న కాంగ్రెస్ ప్రభుత్వం
భద్రాచలం, హైదరాబాద్ ఎక్స్ప్రెస్ సర్వీసులను పునరుద్ధరించాలి
మంథని ఆర్టీసీ బస్టాండ్, డిపో అభివృద్ధిపై దృష్టి సారించాలి
మానిఫెస్టో అమలు కోసం ప్రజల పక్షాన బీఆర్ఎస్ పోరాటం: పుట్ట మధూకర్
అర్జున్ సమాచారం సెప్టెంబర్ 27 మంథని, డెస్క్.
మహాలక్ష్మి పథకం పేరుతో కాంగ్రెస్ ప్రభుత్వం మహిళలను మోసం చేస్తోందని మంథని మాజీ ఎమ్మెల్యే పుట్ట మధూకర్ ఆరోపించారు. మంథని పట్టణంలోని ఆర్టీసీ బస్టాండ్ను ఆదివారం సందర్శించిన ఆయన అనంతరం విలేకరులతో మాట్లాడారు.
కాంగ్రెస్ పార్టీ అధికారంలోకి రాకముందు ఒకలా, అధికారంలోకి వచ్చిన తర్వాత మరోలా వ్యవహరిస్తోందని పుట్ట మధూకర్ విమర్శించారు. ప్రస్తుత ప్రభుత్వ పాలనలో మహిళలు, ఆర్టీసీ ఉద్యోగులు, ఆటో కార్మికులు ఇబ్బందులు ఎదుర్కొంటున్నారని అన్నారు.
మానిఫెస్టో కమిటీ చైర్మన్గా దుద్దిళ్ల శ్రీధర్బాబు మహాలక్ష్మి పథకాన్ని ప్రకటించి మహిళలకు ఆర్టీసీ బస్సుల్లో ఉచిత ప్రయాణం కల్పిస్తామని హామీ ఇచ్చారని, అయితే ప్రస్తుతం బస్సుల సంఖ్య తగ్గించడం, ఎక్స్ప్రెస్ సర్వీసులను తొలగించి డీలక్స్ సర్వీసులుగా మార్చడం ద్వారా అధిక చార్జీలు వసూలు చేస్తున్నారని ఆరోపించారు. మహిళలకు అవసరమైన సమయాల్లో బస్సులు అందుబాటులో లేకుండా చేస్తున్నారని అన్నారు.
గతంలో మంథని నుంచి హైదరాబాద్, దిల్సుఖ్నగర్, మియాపూర్ ప్రాంతాలకు బస్సు సర్వీసులు నడిచేవని, ప్రస్తుతం వాటిని రద్దు చేసి సిద్దిపేట వరకు మాత్రమే సర్వీసులు నడుపుతున్నారని పుట్ట మధూకర్ తెలిపారు. మంథని నుంచి భద్రాచలం వరకు నడిచే ఎక్స్ప్రెస్ సర్వీసులను కూడా డీలక్స్ లేదా లగ్జరీ సర్వీసులుగా మార్చి ప్రయాణికులపై అదనపు భారం మోపుతున్నారని ఆరోపించారు.
మహిళలకు ఉచిత ప్రయాణం కల్పించే పథకానికి అవసరమైన బడ్జెట్ కేటాయింపులు చేయకుండా ఆర్టీసీ అధికారులపై ఆదాయం పెంచాలంటూ ఒత్తిడి తీసుకురావడం వల్ల డ్రైవర్లు, కండక్టర్లు ఇబ్బందులు ఎదుర్కొంటున్నారని అన్నారు. కండక్టర్లను అధిక ఆదాయం తీసుకురావాలని, డ్రైవర్లను మైలేజీ పెంచాలని ఒత్తిడి చేస్తున్నారని ఆరోపించారు.
మంథని ఆర్టీసీ డిపోలో 360 మంది సిబ్బంది ఉండాల్సి ఉండగా సుమారు 190 మంది మాత్రమే ఉన్నారని పుట్ట మధూకర్ తెలిపారు. సిబ్బంది కొరతతో మహిళా ఉద్యోగులు రాత్రి వరకు విధులు నిర్వహించాల్సి వస్తోందని అన్నారు. ఉద్యోగులకు రావాల్సిన ఏరియర్స్ చెల్లింపులపై కూడా ప్రభుత్వం దృష్టి సారించాలని డిమాండ్ చేశారు.
మంథని ఆర్టీసీ బస్టాండ్, డిపో పరిస్థితిపై కూడా ఆయన అసంతృప్తి వ్యక్తం చేశారు. చిన్న వర్షానికే డిపో బురదమయంగా మారుతోందని, బస్టాండ్ అభివృద్ధి విషయంలో కూడా ఆశించిన స్థాయిలో పనులు జరగడం లేదన్నారు. గతంలో తమ ప్రభుత్వం ఉన్నప్పుడు బస్టాండ్లో మట్టి పోయించి చదును చేసి అభివృద్ధి పనులు చేపట్టామని గుర్తుచేశారు.
మంథని బస్టాండ్, డిపోను తన తండ్రి తీసుకువచ్చారని ఎమ్మెల్యే దుద్దిళ్ల శ్రీధర్బాబు పదేపదే చెబుతున్నారని, అలాంటప్పుడు వాటి అభివృద్ధిపై ఎందుకు దృష్టి సారించడం లేదని పుట్ట మధూకర్ ప్రశ్నించారు.
మంథని నుంచి హైదరాబాద్, మియాపూర్, దిల్సుఖ్నగర్, భద్రాచలం ప్రాంతాలకు గతంలో ఉన్న ఎక్స్ప్రెస్ బస్సు సర్వీసులను పునరుద్ధరించాలని ఆయన డిమాండ్ చేశారు. డ్రైవర్లు, కండక్టర్ల సమస్యలను పరిష్కరించడంతో పాటు ప్రజలకు సరిపడా ఆర్టీసీ బస్సులను అందుబాటులోకి తీసుకురావాలని కోరారు.
మానిఫెస్టో అమలుతో పాటు ప్రజా సమస్యల పరిష్కారం కోసం బీఆర్ఎస్ పార్టీ ప్రజల పక్షాన పోరాటం కొనసాగిస్తుందని పుట్ట మధూకర్ తెలిపారు.